去海之戀吖唔該
密閉空間忍笑個案一：以「不如你話俾我知吖」馳名的容海恩議員，在電梯內問記者，你們去哪？記者說在九樓有個記者會，容議員奇問：記者也要開會的嗎？據說當時困在電梯內的記者忍笑忍得很辛苦。不過有斷估，冇痛苦，跟容議員交談，斷估預了要笑的。
密閉空間忍笑個案二比較痛苦：在的士車廂內，司機問去哪裏，斷估唔到乘客會說：「去海之戀吖唔該。」有網民戲言司機會反問：「去乜戀啊？」怎麼會呢？身為一個的士司機，可見將來要預備一兩招忍笑功，是很正常的，怎麼好意思拿別人畢生積蓄開玩笑呢？
其實，樓盤名去到「海之戀」這個層次，是早知有今日的。香港創新科技局成立之後，暫時看不見有什麼科技創意，只好靠發展商在樓盤命名上繼續貢獻，創作就是不停革命，要更上一層樓，就不能留戀過去傑出成就，要繼往開來。當四字系列日出康城、觀月樺峰、御林皇府叫慣口，兩字系列皓畋、珒然、溋玥深到叫不出口，自然要往出口成章出發。其實在海之戀之前，已經有類似走詩意風的影岸．紅出現，只不過中間有一點，唸起來不知道該停頓多久，語氣才夠莊重誠懇，影岸紅又不夠入屋，海之戀這種雅俗共賞之作，大行其道，可以預期。
以後海之戀住客怎麼跟司機講才不致搞笑？其實在車廂密閉空間裏，早已不存在尷尬的空間。英文的Diva、Queens Cube講了也怕口音問題聽不清楚，何文田的半山壹號不在半山怕搞錯，唸不出來的溋玥之類，講了也是白講，不如老老實實把什麼街幾號報上好過。有些新樓名同質性太高，例如流行一時的天字頭：天璽、天晉、天匯、天巒，有沒有天峰呢？等我谷歌一下先，果然有。所以說，一上車，唔該去天巒是很冒險而無效的行為，隨時往反方向行駛。真人真事，上車說去天巒，那司機也很懂行情，笑說天巒跟山頂施勳道倚巒樓價差遠了，我也唯有忍笑。好笑過巒字頭？有個在元朗的爾巒，跟倚巒僅一音之差，兩個都是上聲字，爾字唸高亢些，就從元朗直奔山頂去了。所以樓盤名字在的士上是唸不得的，樓盤名字的意義，不是用來辨識住哪裏，只是買來一個你沒有特別想擁有的感覺。所以，住在海之戀沒關係，除了不會特別變得有愛，跟人講住哪裏，報上地址就好，「去海之戀吖唔該」是不會發生的，發展商好意思你都唔好意思啦。司機會學容海恩說：「不如你話俾我知你想點吖？」
地產業對香港文化貢獻係肯定嘅！由地產經紀嘅劃時代嘅「烏蠅紙」文案，去到驚天動地嘅樓盤名，都令人讚嘆不絕，「咁你都改得出」之聲四起。作為行業龍頭嘅長實（1113），當然走來時代嘅尖端，荃灣西新盤「海之戀」，一對小情侶行入去，「BB，我送『海之戀』俾你。」直頭要起歌唱「有你有我有情有天有海有地」。
好多人話，要對住的士大佬講「海之戀」呢個名講唔出，車…我唔信你咁多年來，未試過喺壽司舖落Order時講「我想要花之戀。」更何況，當你已被訓練到，連「司機，我想去凱旋門。」「我想去帝峰‧皇殿（記全中間停一停）」你都講得出，「海之戀」？濕濕碎啦。
地產商改名，講都尾都係標題黨，嗰期興咩咪改咩名。70、80年代，經濟起飛，人人有個發達夢，銀禧花園、得寶花園，直截了當。到90年代至00年，大家有啲錢，開始知咩係品味，聽濤雅苑、翰林軒呢類咁有文化氣息嘅盤名，冇錯！都係長實出品！
品味嘅嘢，我哋曾經有過！但到底幾時香港樓盤名，開始走火入魔？個人認為，長實第一個「土豪Feel」樓盤，應該要數到大坑「名門」，呢個名05年改嘅；新地（016）凱旋門，個名一公佈，同樣震驚全港，都係05年開始預售樓花。2005年，正正係中國匯改開始，人民幣升值，之後樓價嘅飆升嘅血淚史，唔使多講啦；亦係呢年開始，樓盤就越來越「土豪rized」、「浮誇lized」。
不過有啲嘢係邪嘅，長實樓盤名改得越霸氣，出事嘅機會都越大。名門，嘩！大坑！豪宅！正呀！最新錄二手成交，1752呎單位4,080萬元易手，業主唔單止勁蝕700幾萬，成交價仲平過一手價。08年開售，明明唔喺何文田，但就扮係何文田地段嘅半山壹號，更加係九龍區首屈一指長蝕蟹貨豪宅！睇埋新界區，想當年2010年開賣，聲稱「一脈相連九龍塘」，位於大圍但完全唔近港鐵站嘅名城，更堪稱新晉「蝕讓王」。不過對長實來講，賣出去嘅樓，就好似嫁出去嘅女。只要一手開賣嘅時候，滿足到市場「土豪」嘅需要，就OK啦。
今次長實一改風格，「海之戀」唔土豪兼冇霸氣，理論上唔似Target內地客，反而仲好浪漫。講多次，樓盤名，係時代嘅產物，浪漫，可能係市場需要。就好似東晉時政治腐敗，民間逃避現實，就寄情山水，發展出追求浪漫嘅時代一樣，都係市場需要。超人嘅遠見，你識啲咩呀！？
沒有留言:
發佈留言