荃灣西站4盤 年內逾4,300伙新供應

荃灣西站4盤  年內逾4,300伙新供應

可留意的是，荃灣西站有4個全新盤，包括柏傲灣、海之戀第1期、海之戀第2期及全‧城滙共4,342伙部署年內推出，戶型由開放式至4房均備，各具賣點，勢吸區內上車客及分支家庭注意外，亦可吸引有意換樓的大家庭客。此4個住宅盤將於2018年8月至2019年中分階段落成入伙，既有新商場、新公眾體育館、新公眾停車場，屆時荃灣西站將形成一個全新的生活圈，當中柏傲灣率先登場。

長實（1113）荃灣西站五區新盤做海之戀（Ocean Pride）將提供970伙，預計關鍵日期2018年9月底。

發展商今日透露樓盤戶型資料，一房戶佔160伙，面積370方呎到393方呎；兩房戶佔328伙，面積496方呎到519方呎；三房戶佔443伙，面積734方呎到799方呎；四房戶佔39伙，面積1,113方呎到1,149方呎。另外，項目設43萬方呎商場。

被問發項目推售時間，集團執行董事趙國雄回應指項目正待批預售樓花同意書，「一日未到手我都唔敢講係幾時」

對於新辣招，趙國雄稱集團會「盤照開、樓照賣」，配合港府增加供應的方針。

地產業對香港文化貢獻係肯定嘅！由地產經紀嘅劃時代嘅「烏蠅紙」文案，去到驚天動地嘅樓盤名，都令人讚嘆不絕，「咁你都改得出」之聲四起。作為行業龍頭嘅長實（1113），當然走來時代嘅尖端，荃灣西新盤「海之戀」，一對小情侶行入去，「BB，我送『海之戀』俾你。」直頭要起歌唱「有你有我有情有天有海有地」。

好多人話，要對住的士大佬講「海之戀」呢個名講唔出，車…我唔信你咁多年來，未試過喺壽司舖落Order時講「我想要花之戀。」更何況，當你已被訓練到，連「司機，我想去凱旋門。」「我想去帝峰‧皇殿（記全中間停一停）」你都講得出，「海之戀」？濕濕碎啦。

地產商改名，講都尾都係標題黨，嗰期興咩咪改咩名。70、80年代，經濟起飛，人人有個發達夢，銀禧花園、得寶花園，直截了當。到90年代至00年，大家有啲錢，開始知咩係品味，聽濤雅苑、翰林軒呢類咁有文化氣息嘅盤名，冇錯！都係長實出品！

品味嘅嘢，我哋曾經有過！但到底幾時香港樓盤名，開始走火入魔？個人認為，長實第一個「土豪Feel」樓盤，應該要數到大坑「名門」，呢個名05年改嘅；新地（016）凱旋門，個名一公佈，同樣震驚全港，都係05年開始預售樓花。2005年，正正係中國匯改開始，人民幣升值，之後樓價嘅飆升嘅血淚史，唔使多講啦；亦係呢年開始，樓盤就越來越「土豪rized」、「浮誇lized」。

不過有啲嘢係邪嘅，長實樓盤名改得越霸氣，出事嘅機會都越大。名門，嘩！大坑！豪宅！正呀！最新錄二手成交，1752呎單位4,080萬元易手，業主唔單止勁蝕700幾萬，成交價仲平過一手價。08年開售，明明唔喺何文田，但就扮係何文田地段嘅半山壹號，更加係九龍區首屈一指長蝕蟹貨豪宅！睇埋新界區，想當年2010年開賣，聲稱「一脈相連九龍塘」，位於大圍但完全唔近港鐵站嘅名城，更堪稱新晉「蝕讓王」。不過對長實來講，賣出去嘅樓，就好似嫁出去嘅女。只要一手開賣嘅時候，滿足到市場「土豪」嘅需要，就OK啦。

今次長實一改風格，「海之戀」唔土豪兼冇霸氣，理論上唔似Target內地客，反而仲好浪漫。講多次，樓盤名，係時代嘅產物，浪漫，可能係市場需要。就好似東晉時政治腐敗，民間逃避現實，就寄情山水，發展出追求浪漫嘅時代一樣，都係市場需要。超人嘅遠見，你識啲咩呀！？