荃灣西新樓海之戀 個名愈誇其實愈差？

長實昨日共佈荃灣西新樓盤名稱，驚為天人，就係「海之戀」！公布後隨即喺網上引來廣泛恥笑，並且自行創出多個笑話，例如：「同司機話去海之戀，佢實會問你去乜戀？」其實香港樓盤名已經去到超出大家想像嘅地步，幾乎去到又玄又哲學嘅味道，淨係望住嘅字你都要深思5秒個腦先處理到啲讀音呀。「海之戀」係就係矯情咗啲，不過已經係算簡單架喇！以下呢堆「豪宅」，先係經典中嘅經典！
觀月・樺峯
近年最常見嘅「・」字派代表，市建局觀塘重建首個項目，徐咗不知所云嘅樓盤名之外，仲有「一梯11伙」、「15呎露台」等令人嘩聲四起嘅設計，為「政府帶頭起劏房」嘅最佳代表。
御門・前
一睇個名同樣Get唔到係乜，不過「御門」就好多人都知係解王宮嘅大門，咁即係王宮大門嘅前面？即係住喺門口？而地點又喺正九龍城，即係九龍王帝？媽，好亂呀！
影岸・紅
東涌無數屏風樓其中一道屏風，從外形睇落同其他屏風無乜分別；可能因為咁先改個咁爆嘅名，事實上真係因為呢個MK名而一出市場就「紅」晒，不過據聞係東涌最靚海景喎。
半山壹號
呢個名，如果真係起喺半山，其實係無問題嘅，但佢真正嘅位置係土瓜灣。土瓜灣？土瓜灣？土瓜灣？半山？半山？半山？搭的士會唔會真係畀人車錯去半山？
匯壐
今年新推南昌新盤，有人話「見到個壐字就知唔平」，果然南昌站賣九龍站價錢，不過連啟德都賣九龍站價錢時，又好似幾抵？（橫掂都唔係畀香港人買）
御葡萄
睇個名已為係法國，其實係潭尾牛潭尾路1號，即係元朗呀喂。不過人哋全部係獨立屋，賣緊2千幾萬，呢個名唔係畀住客，係畀住唔起嘅大家「葡萄」下。
日出康城
法國康城竟然搬到過嚟將軍澳，因誠哥當年一句「心曠神怡」為人津津樂道至今，不過由以前恥笑人哋買，到宜家人哋升咗一個Double，我諗業主都唔止心曠神怡，直情係心花怒放。